واحد من الخرفان
انا واحد من الخرفان .. ولابيفهم ولا يفكر
وبعت ضميري للأخوان .. بحبة زيت وكيس سكر
وانا سلفي ووهابي
ومتخلف وارهابي
وبتطوح شمال ويمين .. وماشي في سكتي المايلة
وبكسب من تجارة الدين .. وبعمل تخفيضات هايلة
وانت مؤسس التيار .. وقائد جبهة الانقاذ
زعيم الثورة والثوار .. وللشعب الفقير منحاز
ورمز الزهد والتقوى .. وصادق في الكلام وصريح
وانت القائد الاعلى .. لكل كتائب "المراجيح"
وسوبر مان
وآيرون مان
وأجمد من شاكيرا كمان
لكن عندي سؤال هايف .. بيخطر جوة بالي ساعات
مش انت كنت متحالف .. معانا في اول انتخابات
وياما حضرت مؤتمرات
وقلت خلاص بقينا اخوات
ولما خيرت اترشح .. سيادتك ابتديت تردح
ومش هسكت ومش هسمح .. يا عم اجري بقى وريح
بلا مناضل بلا مجاهد .. ده انت طلعت ليفي كوهين
وخيبة الناس "حمد" واحد .. وخيبة شعبنا "حمدين"
وعلشان خاطر السلطة .. فضلت علينا تستهبل
ركبت "مبارك ابو شرطة" .. وقلت محطتين وأنزل
ده غير اتباع محوطانا .. بأفكار عقلها الصاحي
وريحتك تبقى "حمضانة".. وبرضه يقولوا "صباحي"
وانا فوضت فيك امري
وبترجاك عشان خاطري
بلاش تزعل وتبقى حزين .. وتتألم
وتتلفت وتسأل مين .. بيتكلم
انا واحد من الخرفان
وبيعلم عليك الآن
.......شعر :محمد صلاح
ليست هناك تعليقات:
إرسال تعليق