خالد سعيد

خالد سعيد

خالد سعيد اتقتل مات الفتى مظلوم

ولكل مؤمن اجل ولكل ظالم يوم

هيحس فيه بالخجل قدام اله قيوم

على العباد مطلع وبالقلوب عالم

لايجامل الحاكم

ولاييجي ع المحكوم

نامي في سلام وسكون وامان يا روح خالد

وسيبينا ليكي نكون الاخ والوالد

صمت الجبان ملعون صوت الحشود صامد

بينادي ع السلطان الناس خلاص كرهتك

ضيعت شرعيتك

ومفيش بدل فاقد

                              شعر :محمد صلاح قمصان

الواد كبر

الواد كبر

الواد كبر واستوى وطمع في عرش ابوه

رسم طريقه ونوى والخونة بيساعدوه

قالوا هنقسم سوى وعقدوا اتفاق مشبوه

وعلقوا صورته في ست ميت حته

وفأول استفتا

الشعب قال اتفوه

دي مصر زينة الامم مش عزبة ووسية

ميجيش شوية رمم فاسدين وحرامية

باعوا الضمير والزمم بقروش مصدية

علشان يذلوها ويقلوا في قيمتها

ويخلوا هامتها

م الذل محنية

الذل مش ليها ولا الهوان توبها

والعز ماليها في حواريها ودروبها

الكحل في عنيها .. الحنة في كعوبها

وولادها رجالة ومن قديم الازل

طارحة بذور الامل

 في شمالها وجنوبها

يا ولي عهد البلد وفارس الفرسان

امك مرات الاسد وابوك ابو قردان

بيبخروك م الحسد ويغرقوك برفان

طبل لي ع الواحدة وارقص وغني وهيص

خلاص هتبقى رئيس

في عالم الحيوان 

غنينا

غنينا

دخلوا اليهود القدس

طمسوا تاريخ الامس

وحجبوا نور الشمس ..غنينا

قطفوا عيدان الفل

داسوا رقاب الكل

ولما زاد الذل ..غنينا

وسدوا كل ممر

في البحر او في البر

وعشان نصد الشر ..غنينا

فرضوا علينا حدود

ضربوا علينا بارود
ضربنا وتر العود ..وغنينا

وبكل خسة وجهل

نهبوا الديار والاهل

قتلوا الرضيع والكهل ..غنينا

لموا الغنايم لم

وشيلونا الهم

في عروقنا فار الدم ..غنينا

وانهالوا سب وضرب

م الشرق ومن الغرب

دقوا طبول الحرب ..غنينا
فيارب يا تاخدنا يأما تهدينا

                     شعر : محمد صلاح قمصان

مبارك شعب مصر

         مبارك شعب مصر

مبارك شعب مصر صحيح

                         مهاود مستكين ومريح

بعشرة جنيه يبيع صوته

                      بمية أهيف يقول تواشيح

ويهتف للزعيم وابنه

                           ومايكحش بدون أذنه

ولما يزيد ضباب جبنه

                    يهوذا في نظره يبقى مسيح

مبارك شعب مصر بسيط

                        تملي بيمشي جوه الحيط

وخده مداس لكل الناس

                      وليه في الذل شهرة وسيط

يسيب العالم الشاطر

                              ويعمل للجهول خاطر

ومهما يشوف لابيخاطر

                         ولا بينزل في بحر غويط

مبارك شعب مصر حنون

                             وبيخلي السفيه فرعون

يشيد للهوان معبد

                      ويبني ل اللي ظالمه حصون

في عز النور بيتغمى

                                 وياخد رشوته بذمة

وبيطير م الفرح لما

                            عماد متعب يدخل جون

مبارك شعب مصر يعيش

                        على المعونات وع البقشيش

وليلة العيد يعيشها سعيد

                            وياكل فول ويلبس خيش

ويزرع خير وغيره يدوق

                             ويلبس كل مرة خازوق

ومن ايام فؤاد وفاروق

                           وهوا قتيل رغيف العيش

مبارك شعب مصر عظيم

                                 وقلبه رحيم بكل لئيم

كلامه قليل وباله طويل

                             وعنده الصبر طبع قديم

ومن قبل الميلاد مظلوم

                          ومن كل الحقوق  محروم

في قلبه هموم في جسمه سموم

                              وسجانه يعيش في نعيم

                            شعر : محمد صلاح قمصان

يا خاربها

          يا خاربها

يا زعيمنا يا حليوة يامجدع

                           ياخاربها وسايبها تولّع

بتهشك في ابنك وتدلع

                     وفي فرحه بتصرف وبتدفع

وشبابنا عاطل ومفلس

                              وبناتنا بتبور وتعنس

تحديد نسل بشكل كويس

                         يقطع في خلفنا من المنبع

يا ناسينا ولا سائل فينا

                           وحامينا وكبير حرامينا

يا سفينة وهتغرق بينا

                               ونبينا وبتسكر طينة

بتناضل ضد  الحرية

                              وتعلي مقام الحرامية

ومسود ايامنا الجاية

                            وساحبنا وبتشحت بينا

حطوك على عرش المحروسة

                       وبجهدك صبحت موكوسة

وبخطة جريئة ومدروسة

                      كترت في اراضينا الكوسة

وقانونا بقى هوا الرشوة

                          والصفقة نخلصها بعشوة

 وبمالك هتصاحب نشوى

                           وتنام مع نجوى ونفوسة

 والحرة اكلت بشرفها

                      من جوعها عرت في كتافها

واللي ماكنش زمان يعرفها

                        بقى يدخل وينام في لحافها

  الحوجة خدتها وذلتها

                           خليتها خرجت من بيتها

    للجاي والرايح عرتها 

                            فضحتها والعالم شافها

 وابنك ده حبيبنا وتاج راسنا

                              فرحنا وخلانا رقصنا

 ويارب التورماي يدهسنا

                              علشان يتمتع بميراثتا

 ويجيب شعب جديد ع الزيرو

                                ويذله ويكسر مناخير

 شعب يعيش على فضلة خيره

                      مش يسأل فين ساسنا وراسنا

 بص يا عم الحاج اسمعنا

                            انت سنين وانت مجوعنا

وفي اقرب دوران بتبيعنا

                          يعني مفيش لوجودك معنى 

 واحنا لقينا الحل خلاص

                                بقى عندنا دم واحساس

 من غير ما تدوخ او تحتاس

                                   عايزينك بس تودعنا

  شعبنا قرر انه يثور

                        مش هيعيش على طول مكسور

هيغامر ويعدي بحور

                                      ويحاول يطلع للنور

هنلم في بعض ونتجمع

                                  وهنوصل للبرج ونطلع

وهنحضن بعض وهندمع

                                      وهنقفزمن آخر دور

                                  شعر :محمد صلاح قمصان 

زهور العدرا

زهور العدرا

مولود جديد هيزيد في آل عمران

اهل الهدى والزهد والايمان

والام نذرت نذر للرحمن

لو كان ولد لازم يكون له مكان

جوه بيوت الواحد الديان

يخدم و يمشي في سكة الاحسان

يمكن ينول العفو والغفران

بس الاله يرزقها بصبية

مريم يا اجمل منحة وهدية

في الوجه نور في القلب حنية

الشمس في شروقها

النسمة في هدوئها

والورد دايما ليه ميعاد واوان

الا زهور العدرا في البستان

عبيرها نور ورحمة للانسان

يشفي الصدور ويطهر الابدان

مولاتي نورك زين المحراب

وخلى قلب العاصي رق وداب

والابتلاء بيدق ع الابواب

قومي افتحي للوعد يا صابرة

مانتي الوفية المخلصة الطاهرة

ست النساء في الدنيا والاخرة

وابنك هيبقى للبشر آيه

ومولده حدوته وحكاية

للعالمين وهييجي بالبشرى

مكتوب تكوني انتي امه وابوه

ضميه في حضنك م اللي هيحربوه

لمي الايدين عهد اليهود مشبوه

                                               لم تكتمل بعد

                                      شعر: محمد صلاح قمصان

ضرب القفا

ضرب القفا

ضرب القفا فيه شفا ويخلي حالنا تمام

والجسم يصبح دفا وبصحة طول العام

ومفيش مريض اكتفى م الضرب بالاقلام

والمخبرين لابسين بالطو وسماعة

دكاترة يا جماعة

مش محتاجين برشام

ضرب الحبيب ده زبيب وكنافة بالقشطة

والنقطة فيها نقيب ومعاه امين شرطة

مايحبش التعذيب مايخدش بالواسطة

احنا اللي عمايلنا هتشلهم كلهم

وتملي قاعدين لهم

ع الساقطة واللقطة

فتحة شرج

فتحة شرج

وعدونا بالتغيير وقالوا جالكوا الفرج

هنعدل الدساتير من غير هرج او مرج

وباعوا لنا وهم كبير ولا بان عليهم حرج

وحتى امانينا بقت كما الاساطير

نحلم بفتحة خير

نلاقيها فتحة شرج

عمرك يا حداية ما هتحدفي كتاكيت

ولا ست حرباية ممكن تعمر بيت

ومفيش في يوم آية هتطرب العفاريت

وحكاية الاصلاح طلعت حوار فاشل

عايز امام عادل؟

روح شوفه في الحواديت

                                شعر: محمد صلاح قمصان

قرد الجيل

قرد الجيل

اغانيك يا قرد الجيل مليانة رقة وذوق

طرب وفن اصيل بيخلي باللي يروق

يا ابوشعر صدر تقيل وقصة طالعة لفوق

لويوم لاقيت الناس قرفانة من شكلك

 ماتخليهاش تاكلك

واغسلها بالمسحوق

بتغني وتألف وتلحن الكلمات

وع الجيتار تعزف في معظم الحفلات

وفنجري بتصرف وتجيب مزز وبنات

يصوتوا حواليك ويقطعوا في شعرهم

طب دانت زي اختهم

وكلكم ستات

عشان خاطرنا يا ريت تسكت وماتغنيش

وتروح تقعد في البيت وعيش وسيبنا نعيش

بصراحة لو غنيت هسد ودني بخيش

لان صوتك كئيب وكله حزن وشجن

وحرقة اللي اتسجن

علشان هرب م الجيش

                              شعر:محمد صلاح قمصان

عادل امام

عادل امام

عادل امام فنان السلطة والحكام

بيهاجم الاخوان في وسائل الاعلام

علشان يكون له مكان بين الصفوف قدام

وانا مش زعيم لكن بهتف بعلوا الصوت

 وان شوفت يوم هلفوت

ماباخدش منه كلام

عنتر كسر سيفه بأيده يا فرسان

وعاش على كيفه وساير العيان

وزاد في تخريفه وباع ضميره كمان

سلام يا صاحبي خلاص ده ضميرك اتحول

وصبحت متسول

 عايش على الاحسان

                                   شعر: محمد صلاح قمصان

باعوا القطاع العام

باعوا القطاع العام

باعوا القطاع العام وخصخصوا الشركات

سألنا بعتوا بكام قالولنا ده احنا اخوات

وزيفوا الارقام وزوروا الحسابات

وكل واحد لهف عمولة ومقاولة

وخزاين الدولة

كنسوها بمقشات

وسرحوا العمال في البيت وع القهوة

والله وصدق من قال للمال صحيح شهوة

تبدل الاحوال والطبع على سهوة

وتخلي عم الشيخ ممكن يبيع دينه

عشان رغيف فينو

اوفنجانين قهوة

                            شعر: محمد صلاح قمصان

مع الرصين

مع الرصين

في دولة مخطوفة وكرامتها منداسة

اسامي معروفة ومناصبها حساسة

عقولها مهفوفة ومروقة الطاسة

وولاد اصول كلهم مش عايزة اي جدال

اللي ابوه طبال

 واللي امه رقاصة

ناس نصابين وكلاب ماتت ضمايرهم

ومربوطين ع الباب بيحرسوا كبيرهم

خلوا عيشيتنا هباب وبلدنا من غيرهم

ممكن لا قدر الله تنتج وتتقدم

وولادها تتعلم

وتهل بشايرهم

يا عصابة وطنية من دمنا بتشربوا

 اندال وحرامية وعمالين تنهبوا

ومية في المية هيجي يوم تهربوا

وبقول بما انكم شايفين زعيمكوا رصين

خليكوا يا حلوين

مع الرصين تكسبوا

                               شعر :محمد صلاح قمصان   

الدنيا زي الخيارة

الدنيا زي الخيارة

الدنيا زي الخيارة يا صاحب السلطة

في ربحها خسارة وكلها اونطة

خاينة وغدارة هتخبطك خبطة

وتنط من ايدك وتروح لجزء مريح

مقصدش معنى قبيح

انا قصدي في السلاطة

الخلق دول كلهم منك بيتظلموا

وحتى من حلمهم دايما بيتحرموا

للجزارين سيبتهم وامرت يتفرموا

ده احنا السليم فينا مليان علل وجراح

جاله حول وكساح

والخصيتين ورموا

تسعة وعشرين سنة متبهدلين وياك

يا ديكتاتور الهنا شعبك بيترجاك

انك تغور من هنا مكسورة قلة وراك

سيب الغلابة تعيش خلي الفقير يفرح

خد بؤجتك واسرح

ورينا عرض قفاك

                              شعر:محمد صلاح قمصان

عايز عروسة

عايز عروسة

عايز عروسة تكون عفيفة واصيلة

عنيها احلى عيون مرسومة وكحيلة

الحضن دافي حنون وتبقى من عيلة

تشاركني في ديوني ووحدتي وخوفي

عشان انا ظروفي

 منيلة بنيلة

باسأل على وظيفة بقالي ست سنين

ماملكش تعريفة وماشي بالضالين

يا جيوبي يا نظيفة اشكي البطالة لمين

منايا اتجوز ويبقى عندي عيال

عمرو وكريم ومنال

 ومصطفى وياسمين

ياهرمونات اهمدي ماتولعيش جسمي

فارقيني ياالدلعدي ماتنسنيش اسمي

واتوضي واتمضمضي يا شفايفي وابتسمي

وماتحلميش بالبوس احنا في عصر فساد

والزوجة والاولاد

صبحوا خيال علمي

                          شعر:محمد صلاح قمصان

نهارك سعيد

نهارك سعيد

نهارك سعيد وعمرك مديد

وصحة سيادتك عافية وحديد

وشعبك مريض بينزف صديد

من اسكندرية لحد الصعيد

وماشي في ضبابك وشامم شرابك

وشارب عذابك وقرب يبيض

بتخضع ذليل قصاد اسرائيل

وممكن قريب تمدلها نيل

وحاكم سئيل ودمك تقيل

وموتك خرافة وشيء مستحيل

مجهز عريس لملكك وريث

ضلالي وخسيس وملهوش بديل

خربت البلاد وهنت العباد

وبعت القضية في ارخص مزاد

في قلبك سواد في عقلك عناد

مشاعرك بليدة وزي الجماد

وقاطع ايدينا وخارم عينينا

ورافع علينا ريات الجهاد

                                   شعر: محمد صلاح قمصان

هموت واقف

هموت واقف

تمشي في طريقك عدل يحتار عدوك فيك

باب الشيطان يتقفل تحلى الحياة في عنيك

الصح لو يتعمل تثبت خطى رجليك

ايوة الشيطان شاطر بيشغل الخاطر

بس الاله قادر

برحمته يهديك

وانا كنت دايما كده مصري بعود ناشف

ماهينش يوم سيدة او ابات وانا خايف

اكسر صفوف العدا وع الجهاد حالف

وجبهتي عالية ماتنحنيش لطاغوت

وان كنت لازم اموت

هموت وانا واقف
والملك للمالك مش للزعيم وابنه
وكل ما هنالك ربك بيمتحنه
ولو الظلام حالك في زنزانات سجنه
الشمس ليها ميعاد تنشر علينا النور
والمستكين هيثور
ع اللي نهب وطنه

                                               شعر: محمد صلاح قمصان

اشعاري

اشعاري

اشعاري ابياتها ساكنها ناس فقرا

بهديكي ابياتها يابلدنا يا سمرا

معانيها حسيتها من اهلك الامرا

رافع حروفها ريات تعند وتتحدى

للعاشقين وردة

وللزعيم جمرة

اشعاري درع وسيف بيحارب الظلمة

عيون لكل كفيف وضي في العتمة

وللغلابة رغيف لقمة ورا لقمة

وتوت وعنباية وبرتقان سكري

والحاكم المفتري

تديله بالجزمة

صعلوك وماسك قلم يرد كل حقوق

بينصر اللي اتظلم ويرجع المسروق

بالحبر باعزف نغم وارسم لبكرة شروق

وكلمتي غالية وليها اصل ونسب

ايام بقولها بأدب

وسنين بقلة ذوق

 

                                                 شعر: محمد صلاح قمصان

لو لم أكن مصري

لولم أكن مصري

لو لم أكن مصري واللهي كان احسن

لا هينحني ظهري ولا كنت يوم هحزن

ولايمتلك امري واحد عبيط اصلا

واعيش كأني بطل في فيلم م الافلام

والدنيا تبقى تمام

واشيتي معدن

بس البد دي وطن عشرتها متهونشي

ومهما كان الثمن لاهسيبها ولا همشي

وعنيا ليا السكن وافرشلها رمشي

واجيبلها م السما نجمة تزينها

تفضل على جبينها

سهرانة ماتنمشي

                                           شعر: محمد صلاح قمصان

الشعر للجدعان

الشعر للجدعان

رموني في المعتقل لكني مش ندمان

وجوة مني الامل بيخوف السجان

بالتضحية والعمل تتحرر الاوطان

محبوس على ذمة قصيدة وطنية

عاشقك يا حرية

والشعر للجدعان

قول كلمتك لله وارتاح وسيبها عليه

وان شوفت غيرك تاه دله وخد بأديه

مفيش لا مال ولا جاه هيغوي قلب نزيه

مساجين ورا القضبان لكننا احرار

السجن طعمه مرار

والصبر بيحليه

                                         شعر: محمد صلاح قمصان

كلمات احمد مطر

كلمات احمد مطر

كلمات احمد مطر..

شعر بحق وحقيق بيبين كل شيء

وينور لي الطريق في الترحال والسفر

كلمات احمد مطر

تنزل برد وسلام ع الاشراف الكرام

وعلى ولاد الحرام تنزل زي القدر

كلمات احمد مطر

شوكة في جنب الزعيم وعدية لليتيم

وصراطي المستقيم لو حسيت بالخطر

كلمات احمد مطر

خطبة جمعة واذان يطرد كيد الشيطان

ويأيد نور الايمان في القلب اللي انكسر

كلمات احمد مطر

هيا سفينة النجاة بين امواج الحياة

درع يصد الغزاة والحاكم لوفجر

كلمات احمد مطر

بحروف بتشع نور يملا الروح والصدور

بتقول اغضب وثور لا العمر يضيع هدر

كلمات احمد مطر

بتحرض ع الجهاد ضد الظلم اللي ساد

تحيي نفوس العباد وتوحد في البشر

كلمات احمد مطر

مهما هقول او حكيت مش هوصف منها بيت

وكفاية اني قاريت كلمات احمد مطر

                                                                       شعر: محمد صلاح قمصان

خطب اميرنا

خطب اميرنا

خطب اميرنا دهب لكن دهب عيرة

فيها حقوق العرب ماجتلهاش سيرة

اسمعها يالا العجب هتحس بالحيرة

وكمان عشان تتفهم وتعمر النغاشيش

محتاجة قرش حشيش

أوصندوقين بيرة

كلامه كله جنان بس السبب معروف

اصله بنص لسان والدغ في ست حروف

وفي بقه طقم سنان وبرضه مش مكسوف

ارنب مع الاعداء وع الضعيف جبار

ولو يشوف صرصار

ممكن يموت م الخوف

                                                شعر: محمد صلاح قمصان

مين اللي قال

مين اللي قال؟

مين اللي قال ان الحياه مشوار طويل الخوف ماليه

دور على الحلم اللي تاه منك ولازم هتلاقيه

الدنيا احلى واغلى شيء ماتحبش الرتم البطيء

علشان تعيش خليك جريء اختار طريقك وامشي فيه

مين اللي قال الدين سواك والتقوى لحية وقصر توب

الرب مش عايزك ملاك عايزك بشر تغلط.. تتوب

والجنة دي مخلوقة ليك اميرة وبتنده عليك

سيب الشيطان وارفع ايديك وناجي علام الغيوب

مين اللي قال الحب عيب وليه في قلبك بتداريه

الحب واحة للغريب نخيلها بيضلل عليه

حب العلوم حب الفنون حب البراءة في العيون

حب المناضل في السجون فكر في ضيقته وحس بيه

مين اللي قال ان الرئيس خالد ومش ممكن يموت

متصدقوش ده كلام رخيص مكتوب بخيط العنكبوت

يصطادوا بيه ضعاف النفوس اللي بيجروا ورا الفلوس

يتحولوا حشرات وسوس ينخر في جدران البيوت

                                                    شعر: محمد صلاح قمصان

المحروس

المحروس

هيورثوا المحروس وكلنا في غفلة

وابن البلد بلبوص مطرود من الحفلة

يا بلدنا فيكي نفوس زي الوحوش سافلة

فكرت فيكي كتير لحد عقلي ما مل

حاولت الاقي الحل

مخي عمل قفلة

وخرجت بجراحي بين الدروب هايم 

ماعرفش انا صاحي ولا مشيت نايم

مستني افراحي تظهرلها نسايم

في دنيا غدارة فيها الالم مزمن

تكفر المؤمن 

وتفطر الصايم

و لقيت فانوس مسحور في حتة مقطوعة

دعكته طلع نور وصرخة مسموعة

جني بدراع مكسور دوافره منزوعة

طلبت احكم مصر فقال لي بطل هبل

دانا جي م المعتقل

ضلوعي مخلوعة 

                                         شعر: محمد صلاح قمصان