" مواطن شريف "
مواطن شريف
وهادي والـيف
وعندي المهاودة هواية وكيف
ولاجل البلد دي
بصهين واعدي
وشـايف
وعارف
وعامل كفيف
وعايش حيـاتي .. في امن وامان
وارقص مراتي .. قصاد الـلجان
ضميري بياكلني
واريـال وقـرنـي
لو آكل زبالة وانام ع الرصيف
وحـب الـبـيادة
في قلبي زيادة
وموتي في سبيلها بطولة وشهادة
واسـافـر واجيـلها
وع الراس اشيلها
ومـمـكـن آكـلــهــا
بــســكــر وسـادة
رئيسي بفلاتر .. وراجـل حـكـيــم
مفـتح وشاطـر .. في جذب الحريم
وصـد الـمـؤامــرة
وفـض المظاهــرة
وخلى لبلدنا ريادة
وسيادة
زعـيـمنا
وحاكمنا
وبالسـلـطة أولى
وهو اللي حامي حماكي يا دولة
وزود قـروشـنـا
وبيض وشوشنا
ودخـل جـيـوشنا
في حرب الفراولة
ولـما يـشاور .. أغمض وأفوض
وفوق المنابر .. أهـيج و أحرض
بارود الخنادق
وطلق البـنادق
على اللي يعارض جنوده العتاولة
وبقرا جـرايـد
بتنشر قصايد
في مدح الحكومة لكني محايد
واتابع برامج
هدفها تعـالـج
تـطـرف جحـيمه مشعلل وآيد
واهلس واحشش .. ودارس تــمــــام
فـنون الـتـحـرش .. في وسط الزحام
واهيص في الولايم
وجــمـع غــنـايـــــم
وبـخـلع
وافلسع
فـي عـز الـشـدايــد
... شعر : محمد صلاح
ليست هناك تعليقات:
إرسال تعليق