Powered By Blogger

كباب حلة

تاكلوا كباب حلة وتطفحوني الفت
ونمت ع الملا وسطي اتقطم ونشفت
زمن السكوت ولى خلاص زهقت ..قرفت
هعملكوا مدونة اشعار تعيش للابد
يا مسؤلين البلد نهاركوا زي الزفت

بحث هذه المدونة الإلكترونية

الجمعة، 3 مارس 2017

"المهم نكون كده"

"المهم نكون كده"
 
الحزن عشش ع الوشوش
والخوف سكن فِـ الأفئدة
بس الزعيم
قال ماتخافوش
أحنا المهم نكون كده
قال ماتناموش
وماتطفحوش
وماتحلموش
وماتنطقوش
وماتطلبوش
حتى القروش
ماتشمتوش
فينا العِدا
قولنا تمام حاضر يا بيه
سمعاً وطاعة لحضرتك
ورينا بس هتعمل ايه
واشرح وبَيِن خطتك
دَوَّر شمال
دَوَّر يمين
الخطة ياض وديتها فين؟
ضاعت يا شعب السكرانيين
والغلطة كانت غلطتك
آدي اللي قولت عليه حويط
وهيبقى ليك
ستر وسند
افكاره طلعت بزراميط
داير بيشحت ع البلد
يا أمة ثوري
وأغضبي
وأمشي فِـ طريقنا
وجربي
الثورة نهر هتشربي
هتطهري الروح والجسد

شعر : محمد صلاح