"النور قطع"
النور قطع من عندنا ... ومن المحافظة كلها
النور قطع مع إننا .. حاصرنا غزة واهلها
ورجعنا زمن المصطبة ... حتى العبيد مستغربة
من كتر قطع الكهربا ... تايهة في عتمة جهلها
النور قطع يا ابن المرة ... يا اللي بتدي التفويضات
يبقى بلاش القنعرة ... والبس خازوقك من سكات
والسيسي حلو مفيش كلام ... بالنسبة لولاد الحرام
علشان هيربط اللجام ... ويسوق قطيع الحيوانات
النور قطع يا "محرصين" ... على نفسكم وع الوطن
يا معسكرين ومسيطرين ... بدباباتكم من زمن
واللي مساعدكو مؤيدين ... فاهمين الاستكانة دين
نكسر لهم صنم لعين ... وينحتوا بأيدهم وثن
النور قطع والامن غاب ... والدم في الشارع بحور
والقبر سكنينه الشباب ... و"الكهل" واقف في الطابور
ولايمكن استفتاء يفوت ... من غير ما يدلي فيه بصوت
واللي يموت خليه يموت ... ده شباب عميل لازم يغور
النور قطع وع العموم ... السيسي مدينا الطناش
وبيبني نادي خمس نجوم ... وفيه ملاعب اسكواش
واحنا ظروفنا لو تضيق ... ناكل زبالة من الطريق
عَلَََشان سيادة الفريق ... ماعندهوش حاجة ببلاش
النور قطع فوق يا جدع ... واطلق هتافك ردده
وخلي صرخة الوجع ... تحيي الامل وتجدده
ده عدونا من جلدنا ... رافع سلاحنا ضدنا
واللي مايرضيش ربنا ... بيوقف معاه ويأيده
.... شعر : محمد صلاح
ليست هناك تعليقات:
إرسال تعليق