أفندينا
أفندينا ومولانا بكل صراحة وامانة
برا دماغنا وجاب داغنا وجوعنا وعرانا
لابيفكر ولا بيفهم تعبنا وربنا يعلم
وكل مانبتدي نحلم تموت احلامنا جوانا
سرق كتاكيتنا وفراخنا وكنا نظاف ووسخنا
تملي وراه مدوخنا لان دماغه خرفانة
بياخد مننا فردة وبيبيع البلد خردة
برنسيسة وبقت قردة وشبعت ذل واهانة
بعقله وحكمته خلى مفيش ولا لقمة في الحلة
بنهرش واما نتفلى ننزل قملة عيانة
في عهده الغالي فلسنا نهب دنانيرنا وفلوسنا
عساكره كاتمة انفاسنا وليل ونهار مراقبانا
ولا الاحوال بتتبدل ولا الدستور بيتعدل
وادينا معاه بنتبهدل وايامنا معندانا
عميل مخلص لتل ابيب وطول عمره زعيم كسيب
طلع له شعب في اليانصيب في علبة سمنة كسبانة
براحته بيغسله ويكويه بشوقه بيفرده ويتنيه
وياخد من حباب عنيه ويدي لخلق شبعانة
عايز احزاب موافقينه في كل مناسبة شاكرينه
ولو في ناس معارضينه بيرميهم في زنزانة
شجيع السيما وفتوة وصل للحكم بالقوة
ومين ضيعنا غير هوا ظلمكوا يا ناس يا شقيانة
في وشه اشعاعات ضارة غبار بيلوث القارة
شبابنا هربوا على برة وتاهوا حياره حزانا
نموت م الجوع مايهتمش مبيدمعش او يرمش
همومنا جراح ماتتلمش وروحنا علينا صعبانة
مالوش بين الخلايق زي ما ينفعش في رئاسة حي
وسكتنا يخاصمها الضي طالما هيمشي ويانا
وقعنا في طوله وفي عرضه عشان يمشي لكن برضه
مصمم انها ارضه خلاص خربانة خربانة
شعر: محمد صلاح قمصان
شعر: محمد صلاح قمصان
ليست هناك تعليقات:
إرسال تعليق