جامعة دول عربية
جامعة دول عربية ايه واتأسست من اصله ليه
حق العرب ياما اتنهب وهيا بتصهين عليه
شجب وادانة ع الورق مايرجعوش اللي اتسرق
انا قلبي ع الاقصى اتحرق وف نيني عيني حنين اليه
حققتوا امجاد يا عرب في الانبطاح وفي الهرب
حتى العراق لما انضرب اشجع زعيم غمض عينيه
فالحين لبعض ترقدوا وتبوسوا رجلين العدو
ومستحيل تتوحدوا الا على التوريث يا بيه
اصل العروبة من زمن ماتت ومش لاقية الكفن
ومن الجسد فاح العفن تعالي ياديابة انهشيه
احنا اللي ضيعنا الوطن وتاجرنا فيه بارخص ثمن
بعنا الحسين خنا الحسن ويزيد كتبنا الشعر فيه
سكت الكلام يا امين يا عام شد اللحاف وانعس ونام
وكل شيء هيكون تمام كبر دماغك واشتريه
شعر: محمد صلاح قمصان
شعر: محمد صلاح قمصان
ليست هناك تعليقات:
إرسال تعليق